Futbolli talentet e reja që pritet të shkëlqejnë

Kupa e botës 2010 dëshmoi se talentet e reja në futboll nuk mungojnë. Thomas Muller, Mesut Ozil dhe Sami Khedira shkëlqyen në Afrikën e Jugut dhe dy prej tyre arritën më pas të kalonin në një skuadër të madhe si Reali i Madridit. Jack Wilshere rregulloi pozitat e veta tek Arsenali ndërsa Andy Carroll  arriti të marrë telefonatën nga kombëtarja angleze. Gareth Bale u shndërrua në një personazh shumë të rëndësishëm teksa realizoi një hat-trick përballë Interit. Javier Hernandez erdhi nga askund për tu bërë një prej favoritëve në Manchester United. Por çfarë do të ndodhë në vitin 2011? Tabloidi britanik “Sun” ka realizuar rënditjen e 10 futbollistëve që mendohet se do të shkëlqejnë si talente të reja këtë vit.

1.Neymar, 18 vjeç, sulmues
Çelsi, Manchester City, Real Madrid, Milan dhe Inter janë disa nga klubet kryesore në botë që do të dëshironin shërbimin e Neymar. Braziliani është cilësuar nga disa si një “Pele” i ri i botës së futbollit dhe vendosi që të mos lëvizë duke qëndruar në Santos.

2. Romelu Lakaku, 17 vjeç, sulmues

Fjala fenomen është përdorur për të përshkruar një talent të ri në futboll por në rastin e Lakaku është gjithçka rreth tij. Teksa ishte 16 vjeç dhe luante në sezonin e parë tek Anderlecht u shpall golshënuesi më i mirë në Belgjikë duke shënuar 19 gola në 45 ndeshje. Thashethemet për njëlargim të tijin drejt Real Madrid, Arsenal apo Çelsi kanë qarkulluar prej kohësh.

3. Coutinho, 18 vjeç, mesfushor
Rafa Benitez nuk do të mbahet mend të ketë bërë shumë për Interin por gjithësesi ai do të kujtohet se solli në Serinë A një talent Brazilian që ka rënë në sy. Coutinho firmosi kontratën fillestare me Interin në vitin 2008 por sipas rregullave ai nuk mund të luante deri në qershorin e vitit të shkuar. Coutinhos ju dha shansi të shkëlqente nën drejtimin e Benitez. Kontrolli, triblimet dhe mentaliteti sulmues impresionojnë këdo.

4. Connor Wickham, 17 vjeç, sulmues
Wickham nuk është një 17 vjeçar i zakonshëm. Tekniku i Ipswich ku luan ky futbollist ka bërë maksimumin për ta vendosur në rrugë të mbarë pa e vënë nën presion. Kjo nuk ka mjaftuar që shumë skuadra në botë ta vënë re e të hedhin sytë duke ju dhënë rrugë thashethemeve për oferta deri 10 milionë paundshe.

5. Thiago, 19 vjeç, mesfushor
Tekniku i Barcelonës Pep Guardiola ka sjellë nga skuadra B në atë A shumë talente të reja çka ka freskuar gjakun e katalanasve. Më i miri prej tyre duket se është Thiago i cili me aftësinë brilante të pasimeve është cilësuar një Xavi i ri.

6. Erik Lamela, 18 vjeç, mesfushor
Është thënë se ky është një ndër talentet që Barcelona ka dëshiruar ta firmosë kontratën me të që në moshën 12 vjeçare. Ky nuk është Lionel Messi por po flasim për një tjetër talent të amerikës latine. Gjashtë muaj pasi u bë pjesë e River Plate shumë skuadra të mëdha në botë kanë kërkuar ta marrin. Real Madrid, Milan, Juventus dhe Manchester City është thënë se janë gati të ofrojnë shuma të majme për ta tërhequr në skuadër.

7. Josh McEachran, 17 vjeç, mesfushor
Ka bërë debutimin me skuadrën e Çelsit në shtator në ndeshjen përballe MSK Zilina si një zëvendësim i pjesës së dytë dhe filloi ndeshjen e kthimit në fushë që nga minuta e parë. Tanimë ai ka fituar edhe pozicionin e tij në formacionin e kombëtares anglize nën-21 vjeç.

8.  Mario Gotze, 18 vjeç, mesfushor
Dortmund ka shkëlqyer në sezon duke fituar 14 ndeshje nga 17 të luajtura dhe kryeson tabelën. Një prej yjeve të skuadrës është Mario Gotze i cili ka realizuar një performancë brilante. Trajneri i kombëtares gjermane Joachim Loë e thërriti Gotze për debutimin e parë përballë Suedisë në nëntor.

9. Georgi Schennikov, 19 vjeç, mbrojtës
Mbrojtësi i majtë i CSKA-së po shkon në drejtimin e duhur teksa ka fituar një vend edhe në kombëtaren ruse të futbollit. Performanca e tij në ndeshjet përballë Manchester United dhe Valencias në Ligën e Kampioneve kanë tërhequr vëmendjen e shumë klubeve të mëdha në botë. Duke patur parasysh lidhjet e Abramovich nuk është çudi që ai të shfaqet në vitin 2011 në Stamford Bridge.

10. Alex Chamberlain, 17 vjeç, mesfushor
Është një nga futbollistët më të mirë të momentit në Southampton dhe me performancën e tij ka tërhequr vëmendjen e skuadrave të mëdha ndaj nuk është ndonjë çudi ta shohim këtë vit të luajë në një prej tyre.