Sekretet e banorëve të rinj të “Big Brother”

 

“Sekretet e banorëve, mistere për audiencën, por edhe për të afërmit”
Sonte ngre siparin edicioni i gjashtë i “Big Brother”. Flet autori Rezart Aga.
Sonte në ekranin e “Top Channel” do të nisë edicioni i gjashtë i “Big Brother Albania”. Të gjithë dashamirësit e këtij formati sot do të nisin bashkë me konkurrentët e rinj, rrugëtimin 100 ditësh të një reality show që dihet tashmë se shqiptarët e kanë shumë për zemër. Pjesa më intriguese e këtij edicioni është se ka ndryshime rrënjësore në konceptim. Tani pas pesë edicionesh, duket sikur formula mbi të cilën operonte ai, sikur u dekonspirua nga publiku. Edhe vetë konkurrentët gjatë pesë edicioneve të kaluara duket sikur kanë qenë kopjues shembullorë të paraardhësve të tyre, aq sa gjithçka u bë si matematikë. Kështu, pa kuptuar, në këtë format u instaluan disa rregulla fikse të diktuara nga situatat e mëparshme. Pjesëmarrësit kishin mbajtuar shënime dhe kishin nxjerrë përfundime. Sipas tyre, që të jesh i sukseshëm në “Big Brother” duhet të përdorësh fort intrigën, konfliktin që shkon deri në dhunë, thashethemin, lajkat, lojën me dy porta, por edhe joshjen, pasi kur lidhesh me dikë është avantazh. Por edhe nëse arrin të krijosh një grup, është akoma më mirë. Tashmë që kjo skemë u vjetrua pak, ja ku jemi gati për të lançuar skemën e re, mbase të paaplikuar më parë edhe në shtete të tjera ku shfaqet ky program. Kësaj here stafi që punon për “Big Brother”, na ofron atë për të cilën ka kaq shumë nevojë televizioni, risinë, situatat e paparashikueshme, lojën e ethshme dhe të mistershme. Dhe bëhuni gati, se ata nuk e kanë fjalën vetëm për konkurrentët, por edhe për ne që do ta ndjekim. Në formularin që të rinjtë plotësuan për t’u thirrur më pas në audicione, kishte një shtesë, “shkruani një sekret tuajin”.

Ermali i “Big Brother”, i hyn politikës zgjedhur kryetar i Forumit Rinor të Partisë

rmali i “Big Brother”, i hyn politikës

TIRANE - Duke u nisur edhe nga profili i tij i studimeve të larta, duket se Ermal Merdani, një nga lojtarët më aktivë të “Big Brother 5”, ka bërë tashmë realitet pasionin e tij për politikën, duke u emëruar kryetar i Forumit Rinor të Partisë Demokristiane, FRPDK-së. Kështu, së bashku me kryetarin e Partisë Demokristiane, Nard Ndoka, Ermali ka nisur takimet me të rinjtë në Shqipëri e Kosovë, tashmë që po ndihen edhe ethet e fushatës politike të zgjedhjeve të qershorit. Duket se kjo ka qenë oferta më e mirë që i është bërë këto kohë, ndërkohë që Ermali po shfaqet në ekran në formatin “Tjetri” të Edi Manushit në “Top Channel”. “Unë studioj për Shkenca Politike dhe realisht politikëbërja më tërheq shumë. Në fakt, jam marrë me politikë, e kam qenë dhe nënkryetar i një forumi civil, që tani është bërë politik. Kam pasur oferta po ashtu për të qenë pjesë e partive politike, gjithmonë në strukturat rinore të këtyre partive”, pohon Ermali. Tashmë ai ka vendosur se cilit krah politik t’i bashkohet, kështu që për zgjedhjet e vitit 2013 është i angazhuar në strukturat partiake të PDK-së, ku ka vendosur të aderojë. Duket se Nard Ndoka ka afeksion për personazhet e “Big Brother”, pasi disa vite më parë vendosi emrin e Qetsor Ferunajt në listat e Vlorës për zgjedhjet e fundit, që kur ai ishte brenda në lojën e “Big Brother”, dhe ishte pretendenti kryesor për të fituar lojën. Qetsori në fillim pranoi, por pak ditë para zgjedhjeve vendosi të tërhiqej nga kjo garë politike, pasi e konsideroi të pamenduar nga ana e tij pozicionimin në strukturat e kësaj partie, dhe po ashtu nuk kishte marrë mbështetjen që priste nga Ndoka. Je zgjedhur kryetar i Forumit Rinor të Partisë Demokristiane të Nard Ndokës. Është ky post ajo çfarë dëshiroje në përfshirjen tënde në politikë? Po, kam një muaj që e kam marrë këtë post dhe është diçka shumë e rëndësishme për mua dhe jam vërtet i lumtur. Ambicia ime është që të sjell një frymë të re veprimi, për të qenë shembull i të gjitha forumeve të rinore të partive të tjera politike. Forumi Rinor i Partisë Demokristiane është një derë e hapur për të gjithë dhe një mundësi. Cila është puna jote e përditshme, pra si kryetar i FRPD-së me çfarë po merresh konkretisht? Unë bashkë me kolegët e mi të Forumit tani po hartojmë një platformë, që do të ketë si qëllim afrimin e të rinjve që janë të zhgënjyer nga forumet e tjera politike, po dhe ata që janë jo të përfshirë në politikë. Çfarë do të përmbajë platforma, cilat do të jenë synimet e tua? Platforma do të ketë tri pika që do të jenë; E para është praktika e të rinjve në punësim gjatë studimeve të larta, ndërsa për ata që kanë kryer studimet ne do t’u ofrojmë mbështetje praktike në kompanitë private me të cilët do të kemi marrëveshje. Kjo është një mbështetje shumë e mirë për të rinjtë, pasi lidhet direkt me interesat e tyre përpara se ata të dalin në tregun e punës, në mënyrë që këtë praktikë pune ta kenë si referencë pune. Së dyti do të organizojmë një fushatë informuese gjashtëmujore kundër abortit në gjimnaze, universitete etj. Dhe pika e tretë në platformë do të jetë hapja e disa qendrave argëtuese për të rinjtë e periferive. Sa i pavarur do jesh ti nga kryetari Ndoka, për të bërë fushatë për të rinjtë? Platforma që unë parashtrova më sipër, është ajo ku do të bazohemi për këtë fushatë elektorale për të përfaqësuar jo vetëm të rinjtë e Tiranës, por të gjithë Shqipërisë. Forumi që unë drejtoj vepron në pavarësi nga partia kryesore, fakt që dëshmon një demokraci të brendshme që ne kemi si parti. Ne nuk veprojmë si forumet e tjera që janë në shërbim të kryetarit apo interesave të caktuar, me qëllimin që këto forume të shfrytëzohen vetëm për fushatë apo dhe për protesta të caktuara. Mund të veçosh ndonjë takim interesant gjatë këtij muaji që drejton këtë post? Para disa ditëve kishim takim me ministrin e Kulturës së Kosovës dhe drejtorin e Rinisë pranë kësaj ministrie, ku ramë dakord për realizimin e një projekti të përbashkët artistik për të rinjtë.

Tiranë, s'mori dhuratë për Shën Valentin, i djeg “Chevrolet-in” të dashurit

Dy automjeteve u është vënë flaka orët e para të mëngjesit të ditës së shtunë, ndërsa policia dyshon se autorja ka qenë një femër e inatosur, për shkak se nuk mori dhuratë në ditën e Shën Valentinit. Burime nga policia bënë të ditur për News24 se në një parking në rrugën “Muhamet Gjollesha” janë djegur automjeti tip ‘Chevrolet’ dhe një makinë me targa maqedonase. Burimet konfirmojnë se zjarri është vënë qëllimisht nga një femër dhe shkak mendohet të jetë mungesa e një dhurate nga ana e të dashurit të saj për ditën e Shën Valentinit. Policia dyshon se femra ka pasur qëllim të djegë vetëm ‘Chevroletin’ e të dashurit, por flakët kanë përfshirë dhe automjetin me targa maqedonase që ishte parkuar aty pranë. Mësohet se “Chevrolet-i’ është djegur tërësisht, ndërsa pjesërisht automjeti tjetër. Policia nuk ka bërë ende të ditur emrat e të përfshirëve në këtë ngjarje, por theksoi se po vijon hetimet.